Bylisi u eliminua në Kupën e Shqipërisë nga Vllaznia dhe ballshiotët edhe këtë sezon nuk i shkuan dot afër trofeut. Trajneri Mirel Josa provoi një skuadër mikse, por qe edhe pse shënuan, ballshiotët pësuan dy gola që në pjesën e parë.
Me humbjen 0-1 në Ballsh, në ndeshjen e parë në Ballsh dhe dy golat e pësuar në “Loro Boriçi të mërkurën, mallakastriotët eliminohen dhe mendojnë për Vorën tashmë, sfidë e kampionatit, e fundit e fazës së tretë që luhet të dielën në Ballsh.
Në kampionat, Bylisi synon mbijetesën, duket e vështirë por jo e pamundur, madje synimi është sa më larg zonës së rrezikut ndaj edhe 3 pikët janë detyrim. Skuadra nga Shkodra ka udhëtuar drejt Ballshit dhe është grumbulluar.
Ndërkohë që dje kanë dalë në stërvitje, por me një seancë më të lehtë duke qenë se pjesa më e madhe e lojtarëve luajtën në Shkodër dhe morën ngarkesa ndeshjeje. Ekipi mallakastriot ka edhe tri ditë për përgatitjen e duelit me vorakët, ku synimi është vijueshmëria e ecurisë pozitive në kampionat, ku në dy sfidat e fundit mjaft të forta ndaj Vllaznisë dhe Elbasanit kanë arritur qe të marin 4-pikë.
Bylisi do të jetë me kontingjent të plotë, teksa shpresohet shumë që të jenë gati edhe Bruno e Koxhi, pasi Sulovari u aktivizua ndaj Vllaznisë në Kupën e Shqipërisë. Edhe sulmuesi Olavio që ka ardhur me bujë gjate merkatos është duke kapur formën optimale. Madje në Shkodër shënoi, por edhe spikati me paraqitjen ë tij dhe do te jetë nga minuta e parë, si pikë referimi edhe ndaj Vorës te dielën.
Megjithatë, skuadra duket se është përshtatur mire me afrimet e fundit, ndërsa trajneri Josa pritet qe mos te bëjë shumë lëvizje në formacion. Skuadra dhe lojtarët që kanë bërë paraqitje bindëse ndaj Vllaznisë dhe Elbasanit pritet që të jenë në fushë edhe ndaj Vorës. Ambienti në Ballsh duket optimist, ndërsa pritet që Bylisit të mos i mungojë edhe mbështetja e tifozëve në një duel mjaft të rëndësishëm dhe që mallakastriotët kanë mundësinë më të mirë që të fitojnë dhe të nisin të krijojnë diferencë edhe me rivalët e dy vendeve të fundit në renditje.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
