Sot 3 ditë nga prezantimi i Partisë së Lirisë, subjektit të ri në emër, por të njëjtë me LSI në përbërje, duket se jo të gjithë figurat politike i janë bashkuar. Të paktën deri më tani. Një prej atyre që kanë qëndruar në heshtje është Vangjel Tavo. Ish-deputeti i LSI-së në qarkun Gjirokastër s’ka bërë asnjë reagim së paku në faqen e tij në Facebook. Nuk ka një shpërndarje të postimeve të Ilir Metës, një logo të partisë së re apo një mesazh të dedikuar për rrugëtimin e ri politik të ish-Presidentit.
Ne vëzhguam faqen e tij dhe postimi i fundit që ka bërë është më 19 korrik për hapjen e negociatave me BE-në. Çfarë ka ndodhur me Vangjel Tavon? Largim përfundimtar nga politika pas humbjes së një viti më parë, divorc politik me Ilir Metën e Monika Kryemadhin apo afrim sërish me Edi Ramën?
Muajt e ardhshëm do të tregojnë më shumë teksa afrojnë zgjedhjet lokale të pranverës së ardhshme. Ka zëra që flasin për një kandidim të tij të mundshëm për Bashkinë Dropull, aty ku ka qenë pesha politike më e madhe për të për më shumë se 20 vite. Si kandiadat i opozitës Berisha-Meta apo si kandidat i Edi Ramës, kjo mbetet për t’u parë. Deri në konfirmim të këtyre zërave është ende një kohë e gjatë. ©argjiroja.net
