Java e 24-t sjell një sfidë shumë interesante dhe të rëndësishme në lidhje me objektivin e Kupave të Europës. Partizani pret Luftëtarin, që ka marrë superxhiro dhe gjendet në vend të 4-t aktualisht. Të dyja skuadrat janë eliminuar nga Kupa e Shqipërisë dhe kampionati është e vetmja mundësi për të shkuar në Europë.
Trajneri Klevis Dalipi, i cili ka marrë drejtimin e ekipit pas largimit të Starovës, synon vetëm fitoren dhe ngjitjen e të kuqve drejt vendeve të kreut. Kuptohet, që objektivi i Europës varet nga kombinimet e shumë ndeshjeve javë pas jave, por si Partizani, ashtu edhe Luftëtari, duhet të fitojnë ndeshjet e tyre.
Të kuqtë kanë edhe një hak për të marrë të shtunën, atë të humbjes turpëruese të fazës së dytë, kur pësuan 5 gola në Gjirokastër. Me ekipin është stërvitur edhe sulmuesi Çani. Ndërkohë, në dyshim te Luftëtari është sulmuesi Shkurtaj, që nuk u aktivizua ndaj Kamzës për arsye shëndetësore.
