Pas Ministrisë së Jashtme greke ka reaguar edhe Vangjel Tavo për ligjin e miratuar së fundi në Kuvend për reformën e pronës. Ish-deputeti i Gjirokastrës, që vjen nga radhët e minoritetit grek, thotë se qeveria po tenton të grabisë pronat e shqiptarëve dhe minoritarëve përmes këtij ligji.
Reagimi i tij i plotë
Qeveria nuk i jep zgjidhje problemit që kanë shqiptarët edhe minoritarët me çështjen e pronave, përkundrazi përmes votimit në Kuvend të ligjit të pronave cënoi të drejtat themeltare të njeriut, refuzoi të dëgjonte rekomandimet e Komisionit të Venecias mbi këtë çështje dhe këmbënguli në qëllimin e saj dashakeq për të uzurpuar e grabitur pronat e shqiptarëve dhe minoritarëve në kundërshtim me çdo normë demokratike dhe me Konventën Europiane të të Drejtave të Njeriut. Prona është e drejta e çdo individi. Çdo qeveri që ia heq individit këtë të drejtë është diktatoriale. Ky diktat u pa për gjysmë shekulli. Nuk duhet të kthehemi më kurrë në atë diktaturë. Ky ligj është një dëm i madh për demokracinë e vendit. Një rrëmbim i të drejtave të njerëzve të thjeshtë.
