Qytetarët janë përballur së fundmi me rritjen e çmimit të qumështit dhe kosit me afro 10-15 lekë për shishe, por edhe të produkteve të tjera të bulmetit.
Në një intervistë për SCAN, përfaqësuesi i Industrisë së Përpunimit të Qumështit, Donjaldo Hoxha, shprehet se rritja ka ardhur për shkak se fabrikat janë përballur me kosto shumë të larta në këto muaj, duke nisur që nga çmimi i energjisë elektrike, rritja e çmimit të gazit, të naftës, ambalazhit si dhe lëndës së parë nga fermerët. Sipas tij, në këto kushte ka qenë e pamundur që këto kosto të amortizoheshin, duke mos u reflektuar në çmimin final.
Sipas tij, qeveria ka qendruar indiferente ndaj kërsave të industrisë për të amortizuar këto kosto, të paktën për dy ndërhyrje që do të ishin lehtësuese.
Industria e Përpunimit të Qumështit kërkon nga qeveria që në këto kushte të rishikojë vendimin për rritjen e akcizës së gazit nga 1 korriku 2022, me argumentin se do të rriste edhe më shumë kostot, duke i çuar fabrikat drejt falimentit.
