Luftëtari ka arritur të fitojë ndaj Skënderbeut me rezultatin 3-1, në takimin e parafundit të Kategorisë Superiore. Në një intervistë për “Supersport”, trajneri i bluzinjve, Hasan Lika është shprehur i lumtur për rezultatin e arritur, ndërsa ka këshilluar futbollistin Liçaj që të jetë më i kujdesshëm, duke parë nervozizmin e tij pas zëvendësimit.
“Po vazhdojmë të luftojmë në fushën e lojës, pasi kemi qënë në presion të objektivit që i kemi vetes. Jemi goditur edhe nga goli i marrë, por kemi reaguar menjëherë dhe kjo është për t’u vlerësuar. Ne kemi ndeshjen me Lushnjen dhe duhet të marrim maksimumin dhe atje. Sa i përket të ardhmes, kjo diskutohet kur të jetë arritur objektivi. Liçaj nuk e priti mirë zëvendësimin, megjithëse ishte një zgjehdje teknike. E falënderoj për kontributin që ka dhënë, por duhet të tregohet më i kujdesshëm. Tashmë jemi më të qetë, duke marrë parasysh rezultatet që ne kemi arritur”, ka thënë Lika.
