Largimi i papritur i Mentor Hazirit nga shtëpia më e famshme në Kosovë, vetëm pak orë pasi kishte nisur aventura e tij, shkaktoi shumë pikëpyetje dhe diskutime në rrjet. Por mbrëmë, këngëtari vendosi të flasë për herë të parë, duke zbuluar një arsye shumë më të rëndë sesa çdo aludim apo hamendësim.
Në një reagim të sinqertë dhe emocional, Haziri ka rrëfyer se pas largimit fshihej një dhimbje e thellë familjare. Ai tregon se vetëm një ditë para se të hynte në shtëpi, kishte përcjellë për në banesën e fundit djalin e dajës, një person shumë të afërt me të, i cili kishte ndërruar jetë në Shtetet e Bashkuara. Trupi i tij ishte sjellë në Kosovë pak para nisjes së programit.
“Dhimbja ishte shumë e madhe për t’u përballuar. Një ditë para se të hyja, kam varrosur djalin e dajës… një njeri shumë të afërt me mua,” është shprehur ai, duke treguar peshën emocionale që mbante brenda, ndërsa publiku e shihte në ekran pa e ditur dramën që po kalonte.
Artisti shton se u përpoq të respektonte angazhimin e marrë ndaj produksionit, por gjendja e tij shpirtërore nuk i lejoi të vazhdonte. “Zemërthyerja ishte më e madhe se ky vendim dhe ajo bëri të veten,” shkroi Haziri, duke theksuar se nuk mund t’u jepte shikuesve energjinë, humorin apo muzikën që ata prisnin prej tij.
Megjithatë, ai ka falënderuar produksionin për mirëkuptimin dhe ka përshëndetur banorët, duke i cilësuar “fantastikë”.
Një largim i detyruar nga dhimbja, që kujton se, përtej çdo spektakli, realiteti dhe humbjet njerëzore mbeten mbi gjithçka.
