Ryan Gosling dhe Eva Mendes janë shfaqur së bashku në publik për herë të parë pas më shumë se një dekade. Çifti u shfaq në emisionin “The Tonight Show Starring Jimmy Fallon”, ku aktori kishte përgatitur një surprizë të veçantë për ditëlindjen e partneres së tij.
Gjatë emisionit, Gosling i kërkoi publikut të këndonte për Mendes, e cila ndodhej në prapaskenë. Një anëtar i stafit shkoi ta merrte, ndërsa aktori bëri shaka duke thënë se “mund të më gjeni në lumin Hudson nesër”. Kur Mendes doli në skenë mes duartrokitjeve të publikut, Gosling i kapi dorën dhe të dy u ngjitën së bashku në skenë.
Aktorja u shfaq me një stil casual, duke veshur një kardigan blu me vija të bardha të Louis Vuitton, që më parë ishte veshur nga Gosling në një paraqitje televizive. Ajo e kombinoi me xhinse të gjera me stil retro dhe një bluzë bardhezi me kopertinën e albumit të vitit 1980 “Double Fantasy” të John Lennon dhe Yoko Ono. Ndërkohë, Gosling kishte veshur një këmishë të zezë me pantallona të zeza dhe një xhaketë gri me kopsa të arta.
Moderatori Jimmy Fallon zbuloi se në publik ndodheshin edhe drejtues të bandës së shkollës North Bergen High School nga New Jersey, të cilët interpretuan këngën “Happy Birthday” për Mendes, ndërsa në skenë u shfaq një flamur me urimin për të. Momentin festiv e shoqëruan duartrokitje, konfeti dhe një puthje falënderuese nga Mendes për Gosling.
Kjo paraqitje publike vjen më shumë se 10 vjet pasi çifti u shfaq së bashku në tapetin e kuq në premierën e filmit “The Place Beyond the Pines” në vitin 2013. Gosling dhe Mendes u njohën gjatë xhirimeve të këtij filmi në vitin 2011 dhe që atëherë kanë zgjedhur ta mbajnë marrëdhënien e tyre larg vëmendjes publike.
Çifti kanë dy vajza, Esmeralda dhe Amada, ndërsa Mendes në vitin 2022 la të kuptohej se ata janë martuar në privatësi. Ndërkohë, filmi i ri i Gosling, “Project Hail Mary”, pritet të dalë në kinema më 20 mars.
