Nga Roland Bejko
(Është bela me të paditurin sepse atë nuk e iluminon dot as karrigia e Presidentit të Republikës, as pasuria marramendëse, as luksi ku jeton… Ato të mbushin stomakun dhe kuletën, por jo trurin. Trurin ta mbush dija!)
Deklarata e Presidentit të Kosovës z. Hashim Thaçi që anatemoi me nënkuptim ish-Presidentin dhe ish Kryeministrin e Shqipërisë z. Sali Berisha duke i kërkuar në një farë mënyre këtij të fundit të mbyllë gojën për zhvillimet e fundit të papritura në Kosovë, është dëshmia më e mirë e një niveli katastrofik të inteligjencës dhe kulturës politike të këtij njeriu që edhe pse ka tërë jetën në krye të politikës kosovare ende nuk ka mësuar ABC -në e komunikimit politik, diplomatik dhe institucional.
Presidentit të çdo shteti ja do detyra të karakterizohet nga URTËSIA dhe jo nga emotiviteti.
Qëndrimet institucionale nuk formulohen mbi bazën e thashethemeve që burojnë nga mejhanet apo qoftoret e Kosovës, për më tepër kur e di se bëhet fjalë për z. Berisha, liderin më karizmatik për popullin e Kosovës dhe të gjithë shqiptarëve së bashku me Dr. Rrugovën.
Nuk i falen një presidenti gafa të tilla! Po staf këshilltarësh, a ka ky personalitet i lartë shtetëror?!
Si mund të reagojë Presidenti kështu, sikur me qenë çun lagjeje fiks në momentin më delikat të historisë së kombit shqiptar që pas shpalljes së pavarësisë së Kosovës, e që ngjan si zgjatim i 1913-ës ?!
Apo ndoshta me deklaratën e dytë, këtë ndaj z.Berisha deshi të mbulonte deklaratën e parë, atë se “… do të ketë vetëm një korrigjim kufijsh…”, por që mesa duket është një pazar i mbyllur shkëmbim territoresh me Serbinë. (?!)
E gjithë kjo është tregues i mungesës së inteligjencës së z. Thaçi, pasi në një rast të tillë kaq delikat atij nuk i lipset konflikti dhe armiqësia me z. Berisha, por kompromisi dhe miqësia me të për shkak të ndikimit përcaktues të tij mbi shqiptarët. Tek e fundit z. Berisha pohoi një të vërtetë të frikshme kur tha se rishikimi i kufijve të Kosovës do të hapte Kutinë e Pandorës në Ballkan.
Nga kjo sjellje kuptojmë se z. Thaçi nuk është konsultuar më parë me asnjë prej faktorëve relevantë të shqiptarëve, dhe korrigjimi i kufijve i bie që të jetë ide e tij dhe klanit që ka pranë.
Gjithsesi, vështirë se mund të mbulohet dielli me shoshë.
Tani në fakt, duhet të mos merremi më me lajthitjen e z.Thaçi ndaj z. Berisha, sepse kjo është ashiqare e dukshme që është thjesht një kapsllëk truri, kompleks inferioriteti personal i tij ndaj këtij të fundit sepse dihet që kur flasin të dy njëherësh kosovarët do dëgjojnë vetëm zërin e Berishës, ndaj ne duhet ta fokusojmë vëmendjen tonë tek pazari i rrezikshëm i zhvendosjes së kufijve Kosovë-Serbi. Ai është sebepi i vërtetë, dhe e vërteta e hidhur e këtij nervozizmi.
Një deklaratë e tillë pa konsensus të gjerë mund të na çojë në luftë !
Nëse z. Thaçi ka rënë paraprakisht dakord fshehtas me Serbinë dhe ndërmjetësit ndërkombëtarë për kalimin e veriut të Kosovës Serbisë pa pyetur më parë popullin e Kosovës që ka derdhur gjakun e bijve të vet për lirinë e saj dhe karriget e përjetshme të Hashimit, atëherë kjo po që është tradhti kombëtare.
Dhe tradhtarët dihet se ku e kanë vendin në histori. Gjithsesi, rasti i këtij njeriu na dëshmon se i padituri sado trim që të jetë, është rrezik real për njerëzimin kur i besohen fatet e një populli të tërë, për më tepër kur bëhet fjalë për Ballkanin.
Ndaj, le të lusim zotin që pengjet dhe marrëzitë e tij për të hyrë i vetëm në histori të mos i paguajnë shtrenjtë shqiptarët në një botë që po ndryshon shpejt dhe çuditshëm, nën ritmet që ia dikton asaj Presidenti Donald Trump nga njëra anë dhe këta të tjerët nga Lindja jonë nga ana tjetër.
