Futbollisti i njohur portugez, Diogo Jota, së bashku me vëllain e tij, Andre Silva, humbën jetën në një aksident automobilistik më 3 korrik në Spanjën veriore. Ngjarja ndodhi vetëm pak ditë pasi Jota kishte kurorëzuar dashurinë e tij me partneren e fëmijërisë, Rute Cardoso.
Lajmi tronditës ka lënë të pikëlluar jo vetëm familjen dhe miqtë e afërt, por edhe të gjithë komunitetin sportiv. Diogo Jota ishte baba i tre fëmijëve të vegjël: dy djemve, Denis dhe Duarte, dhe një vajze të vogël, e cila erdhi në jetë në nëntor 2024, emri i së cilës nuk është bërë publik.
Në fushën e lojës, Jota konsiderohej si një nga figurat kyçe të Liverpool-it, duke qenë pjesë e skuadrës që fitoi titullin e Premier League në sezonin 2024–2025. Ishte ky trofeu i katërt që ai ngrinte me klubin anglez, përpara se fati t’i ndërpriste tragjikisht karrierën.
Pasuria e tij, sipas burimeve si “Celebrity Net Worth” dhe “Capology”, vlerësohej në rreth 15.3 milionë euro. Përveç pagës bazë prej 5.9 milionë eurosh në vit dhe bonuseve që arrinin deri në 1.65 milionë euro, ai përfitonte edhe nga kontratat me sponsorë si Nike dhe EA Sports, si dhe nga aktivitetet në sportet elektronike, me të ardhura mbi 2.3 milionë euro.
Jota zotëronte një vilë luksoze në Lisbonë, e vlerësuar në 2.35 milionë euro, si dhe disa automjete sportive të nivelit të lartë.
Sipas mediave spanjolle, shkaku i aksidentit dyshohet të ketë qenë një defekt në gomën e automjetit Lamborghini Huracan që ai drejtonte. Goma shpërtheu gjatë një parakalimi në rrugë me shpejtësi të lartë, duke bërë që makina të përmbysej dhe të përfshihej nga flakët.
