Pero Pejiç konfirmohet edhe një herë tjetër si një prej lojtarëve më të mirë te skuadra e Kukësit. Me 15 gola të shënuar në Superiore, kroati është kthyer në një pikë të fortë në sulmin e verilindorëve, të cilët janë në garë për të fituar titullin kampion dhe kryesojnë Kategorinë Superiore. Sulmuesi nuk neglizhon shënimin e golave edhe në ndeshjet miqësore dhe një gjë e tillë u pa edhe në sfidën me Lirinë e Prizrenit.
Kur skuadra po humbiste në shifrat 2-1, trajneri Gjoka hodhi në fushën e lojës Eminin e Pejiçin. Ky i fundit arriti të shënonte dy gola, duke barazuar shifrat. Në një prononcim të dhënë për “Panorama Sport” pas asaj ndeshjeje, Pejiç shprehet se ka objektiv të shënojë në çdo përballje, pavarësisht nëse ato janë miqësore apo takime zyrtare.
“Sigurisht që jam i kënaqur, sepse kur unë shënoj gola ndihem i lumtur, pasi ajo është detyra ime. Golat janë shumë të rëndësishëm për mua dhe, nëse vijnë në ndeshje miqësore apo në stërvitje, rëndësi ka që të shënoj, pasi kjo është puna ime. Në ndeshjen ndaj Lirisë, unë luajta rreth 20 minuta dhe shënova dy herë në portën kundërshtare.
Për mua, të gjithë golat janë të rëndësishëm. Shpresoj që të vazhdoj kështu edhe në kampionat. Po punoj shumë për të vijuar këtë ecuri”, ka thënë fillimisht lojtari, i cili kryeson listën e golashënuesve në elitë.
Ndeshja
Miqësorja ndaj Lirisë ishte një test për Kukësin në prag të takimit ndaj Luftëtarit, të cilin verilindorët do ta luajnë në shtëpi. Nuk duhet harruar se gjirokastritët ia kanë bërë punën e vështirë Kukësit në dy përballjet e mëparshme, ku në Kukës vendasit kanë fituar minimalisht, ndërsa kanë barazuar 2-2 në transfertë.
“Për ndeshjen e radhës ndaj Luftëtarit kemi një javë kohë për t’u përgatitur dhe, për mua, personalisht është shumë mirë që golat i shënova para kësaj sfide. Besoj që do jetë një takim i vështirë, pasi Luftëtari ka bërë lojëra shumë të mira këtë sezon. I kemi parë ata gjatë gjithë kampionatit, kemi respekt për ta, por ne jemi në një moment që na nevojitet vetëm fitorja, ndaj do të hyjmë në fushë për ta siguruar atë”, ka vazhduar Pejiç, i cili komenton edhe garën për titullin kampion dhe rivalitetin mes tri ekipeve.
“Do të ketë një garë interesante deri në fund të kampionatit dhe rivaliteti do të jetë i madh. Por, ndërsa ne luajmë ndaj Luftëtarit në një ndeshje të vështirë, rivalët tanë e kanë edhe më delikate, pasi janë përballë njëri-tjetrit. Në këtë ndeshje secila prej skuadrave do të lërë pikë dhe kjo është mirë për ne, që nga ana tjetër duhet të marrim pikët e plota”, ka mbyllur Pejiç.
