Nga Mirela Kumbaro
Në rrugëtimet e vështira bashkëpunëtorët janë më të vyer se sa në projekte normale. Ne projekte te guximshme ku pakkush të ndjek, ai që të ve krahun është ai që beson tek ty. Në sfida që duken si ëndrra vetëm kush guxon të ndjek, prandaj ai është shok e bashkëpunëtor i vërtetë. Për të tillë shokë falenderimi është pak dhe çdo akt vlerësimi nuk është asnjëherë shumë. Të tillë janë dy bashkëdrejtorët e Fondacionit Shqiptaro-Amerikan për Zhvillim, The_AADF , Martin Mata dhe Aleksandër Sarapuli, me të cilët nisem 8 vjet më parë një bashkëpunim për realizim të projekteve të Qeverisë Shqiptare që gjetën mbështetje partneriteti si rrallë tjetër nga Bordi i Fondacionit dhe Presidenti i tij Michael Granoff.
Nga Pazari i Krujës te ai i Korçës, nga Muzeu Marubi te Pazari i Gjirokastrës, nga Qendra historike e Vlorës te projektet e digjitalizimit të fondeve muzeale, nga biletaritë elektronike nëpër sitet e trashëgimisë te Plani i Menaxhimit të Butrintit, dhe deri te kantieri juridik i ligjit për Trashëgiminë Kulturore dhe Muzetë, – sa shumë! – janë projekte që sot bëjnë krenar secilin prej skuadrave tona në Ministrinë e Kulturës dhe në Fondacionin Shqiptaro-Amerikan për Zhvillim. Më mirë vonë se kurrë, i lumtë Kryetarit të Bashkisë së Gjirokastrës, Flamur Golemi që zgjodhi pikërisht mirënjohjen e Qytetit të Gurtë, ndaj Aleksandrit dhe Martinit, si formën më të mirë për të kremtuar 16 vjetorin e hyrjes së Gjirokastrës në listën e pasurive botërore të UNESCO. Është mirënjohje për punën dhe pasionin e tyre në këtë rrugëtim të përbashkët. Dhe nuk ka emocion më të madh se sa të prekim sot ëndrrën tonë të përbashkët të bërë realitet! Dhe puna vazhdon! Puna vazhdon edhe për Gjirokastrën time që dje i bëri ata “Qytetarë nderi” të Gjirokastrës. Faleminderit Martin! Faleminderit Aleksandër!
