Duke marrë shkas nga dy rastet e bëra publike gjatë javës së shkuar për dhunë mes adoleshentëve, ministrja e Turizmit dhe Mjedisit, njëherazi edhe deputete e qarkut, Mirela Kumbaro, zhvilloi sot një takim me strukturat vendore në Gjirokastër. Siç mëson argjiroja.net në takim kanë qenë të pranishëm drejtuesit e shkollava, Zyrës Arsimore, Policisë së Shtetit, spitalit rajonal, Shëndetit Publik, kryetari i bashkisë, prefekti dhe drejtuesit e bordeve të prindërve. Kumbaro nuk i ka kursyer tonet e larta për punën e të gjithëve për parandalimin e dhunës në cilëndo formë që ajo shfaqet, sidomos në radhët e nxënësve dhe adoleshentëve.
Mësohet se ajo kërkoi një vëmendje dhe përgjegjshmëri më të lartë të të gjitha institucioneve për parandalimin e këtyre ngjarjeve që dëmtojnë jo vetëm protagonistët, por cënojnë gjithashtu edhe klimën sociale nëpër shkolla dhe më gjerë në komunitet. E po kështu edhe një angazhim të shtuar të vetë komunitetit i cili ne çdo rast duhet të ketë një rol proaktivë për të mos lejuar ngjarje të tilla. Parandalimi i dhunës është një punë e përbashkët e gjithë shoqërisë jo thjesht një detyrë funksionale e disa institucioneve.
Rasti më tronditës ishte ai i dhunimit të një adoleshenti nga 6 bashkëmoshatarë të tij. Argjirolajm.net publikoi ekskluzivisht pamjet e rënda, ndërsa policia bëri ndalimin e të rinjve dhe çështja u referua në Prokurori për hetime të mëtejshme. Veç kësaj policia njoftoi për një tjetër rast pranë shkollës pedagogjike “Pandeli Sotiri”, ku disa të rinj dhunonin një bashkëmoshtarin e tyre. Video e dhunës u publikua në rrjetin social “Tik Tok”. Protagonistët u shoqëruan në komisariat dhe po hetohen në gjendje të lirë. ©argjiroja.net
