Një jaht turistik që kishte brenda dy persona e po lundronte nga porti i Orikumit në drejtim të Himarës ka pësuar defekt dhe kërkonte ndihmë.
Drejtoria e Përgjithshme Detare bën me dije se mjeti turistik i tipit jaht me emrin “AISHA 2479″ i cili ishte nisur nga porti i Orikumit me 2 persona në bord në orën 06:00 dt.18.08.2020 me destinacion Himarën gjatë kthimit për në Vlorë kishte pësuar defekt në afërsi të Kepit të Gjuhëzës dhe kërkonte ndihmë.
“Në orën 19:45 u nis mjeti i policisë BP-05 në drejtim të mjetit në rrezik. Në orën 20:17 u nis dhe anija e RB P-112 nga Sazani sepse mjeti i policisë nuk po e lokalizonte dot jahtin ne rrezik. Në orën 20:55 anija P-112 u takua me jahtin AISHA 2479 në afërsi të shpellës së Haxhi Alisë në koordinatat 40 º26 ’06 N dhe 19º17 ’05 E dhe filluan rimorkimin drejt portit të Vlorës. Në orën 22:10 anija e RB P-112 me jahtin AISHA 2479 u akostuan në molin zero në portin e Vlorës”, njoftoi Drejtoria e Përgjithshme Detare.
Sipas DPD, operacioni përfundoi me sukses si rrjedhojë e një bashkëpunimi dhe koordinimi veprimesh nga salla e Qendrës Operacionale Ndërinstitucionale Detare (QNOD) dhe mjeteve në terren.
