Këlcyra dhe Domosdova janë ndarë në barazim 1-1 në sfidën e fundit të kampionatit. Një takim që shërbente vetëm për statistikë, pasi asnjë prej skuadrave nuk kishte synime. Takimi ka nisur i shpejtë për vendësit, të cilët rrezikuan në të 8-ën me anë të Metkos. Të parët realizojnë miqtë që pas një kundërzbritje gjejnë portën mike me anë të Beqos në të 25-ën.
Në 45 minutat e dyta, tekniku Spahiu hedh në fushë mbrojtësin Kule dhe loja merr tjetër pamje. Metko kthen në gol një 11-metërsh të dhënë në të 60-ën. Edhe dy minutat shtesë të dhënë nga kryesori nuk sjellin asgjë të re.
AKUZAT
Në lidhje me këtë sfidë, trajneri i Domosdovës, Erald Karriqi, ka deklaruar se lojtarët miq ishin të dehur dhe në këtë mënyrë kanë aplikuar një lojë shumë të fortë me goditje të rrezikshme ndaj miqve.
“Filloi ndeshja e qetë dhe shënuam dhe kaluam në avantazh 1-0. Lojtarët kundërshtarë, duke mos u pajtuar me rezultatin, filluan të lëshojnë ofendime, pështyma, goditje me grusht, me shkelma dhe bërryla. E thënë shkurt, një ndeshje futbolli u kthye në arenë boksi. Ndërkohë, gjyqtari i takimit Marianito Troka nga Fieri qëndronte dhe vëzhgonte sesi ushtrohej dhunë mbi lojtarët e mi.
Minimalisht duhet të akordonte 2-3 kartonë të kuq. Situata degradoi deri aty sa isha gati për të tërhequr ekipin nga fusha e lojës sepse po vihej në rrezik jeta e lojtarëve të mi. Në pushim të ndeshjes mësova nga lojtarët e mi se futbollistët kundërshtarë ishin të dehur dhe këtë ma konfirmoi edhe kolegu im, trajneri i Këlcyrës, duke më thënë: ‘Nuk kam çfarë t’ju bëj sepse ata janë të pirë’.
Filloi pjesa e dytë me të njëjtat episode derisa gjyqtari akordoi një penallti inekzistente dhe Këlcyra barazoi 1-1. I bëj thirrje Federatës të marrë masa për këto palo ekipe dhe palo gjyqtarësh, pasi ne shkojmë për të luajtur futboll dhe jo për të vënë në rrezik jetët tona”, deklaroi trajneri i Domosdovës, Erald Karriqi, në reagimin e tij për gazetën.
