Paraqitjet e mira që ka bërë me Luftëtarin shpërblehen për Kristal Abazajn.
Sulmuesi 20-vjeçar, zbulimi i këtij sezoni në Kategorinë Superiore, ka marrë për herë të parë ftesë nga Kombëtarja U-21. Autori i tre golave me fanellën bluzi do të jetë tashmë pjesë e ekipit të drejtuar nga Alban Bushi për miqësoret ndaj Moldavisë më 23 dhe 27 mars.
Lajmin e ka bërë të ditur klubi i Luftëtarit me një postim në “Facebook”. E veçanta ka të bëjë me faktin që vetë lojtari ende nuk ishte në dijeni të ftesës së mbërritur në klub, pasi në momentin e postimit Abazaj ishte duke u stërvitur.
“Ndërkohë që ky djalë po stërvitet dhe nuk e ka marrë akoma lajmin, po ju bëjmë me dije se në zyrat e klubit në këto momente ka mbërritur një ftesë për grumbullimin e tij me Kombëtaren U-21 në ndeshjet e radhës!”, thuhet në komentin që shoqëron foton e sulmuesit gjatë stërvitjes./panorama sport
