Policia austriake ka mësyrë 18 vende dhe ka arrestuar 14 persona pas sulmit që solli vrasjen e 4 personave në qendër të Vjenës. Në perëndim të Vjenës është vënë në pranga një i dyshuar i cili mendohet se kishte kontakte me autorin e krimit. Personi që kreu atentatin dhe u vra nga policia disa minuta pasi hapi zjarr në bare të mbushura me njerëz, u identifikua si një xhihadist 20-vjeçar, i liruar nga burgu më pak se një vit më parë. Një burrë dhe një grua e moshuar, një kalimtar dhe një kameriere u vranë në sulm dhe 22 njerëz, përfshirë një polic u plagosën, tha Ministri i Brendshëm Karl Nehammer në një konferencë shtypi. Kryebashkiaku i Vjenës tha se tre persona ishin ende në gjendje kritike.
Autoritetet kanë thënë se nuk mund të përjashtonin mundësinë që qitës të tjerë ishin akoma të lirë dhe u kërkuan njerëzve të shmangnin qendrën e Vjenës, e cila ishte kryesisht e shkretë të martën.
