Largimi i prefektit të Gjirokastrës ishte diçka që pritej. Jo për shkak të performancës së tij e as të profilit që i dha institucionit në këto 3 vite, por për shkak të momentit politik ku ndodhemi. Tani që fushata ka nisur socialistët duan të përfshijnë të gjithë funksionarët e tyre në përpjekjen për të marrë mandatin e tretë. Ish numri dy i Qendrës së Radarëve, i cili u emërua Prefekt 3 vite më parë, ishte larg të qënit një person që mund të përfshihej në mënyrë proaktive në betejën elektorale të 25 prillit.
Odise Kote nga ana tjetër ka një përvojë të gjatë në strukturat e Partisë Socialiste dhe në organizimet elektorale. Nuk jemi duke thënë këtu që Prefektura Gjirokastër me Odise Koten do kthehet në shtab elektoral i socialistëve, por me atë në krye, pritshmëritë janë për një rol më aktiv në mbledhjen e votave dhe maksimizimin e rezultatit. Astrit Aliaj është i nje profili tjetër dhe në këtë moment politik ishte personi më i papërshtatshëm për socialistët. Kjo është arsyeja kryesore e lëvizjes së tij. Nga ana tjetër jemi ende në kushtet e një normaliteti. 3 vite janë mjaftueshëm për një mandat si përfaqësuesi i Kryeministrit në pushtetin lokal dhe kohë e plotë për të treguar veten. Analiza e mandatit 3-vjeçar të Astrit Aliajt kërkon një shkrim më vete.
Ai mbase mund të ketë vetëm një merak pas largimit nga ky pozicion. Nuk arriti dot të provonte, sipas tij, lidhjet tona me bandat e drogës. Ish-prefekti i Gjirokastrës është shprehur me zë dhe figurë se ArgjiroLajm.net ishte e lidhur me bandat e drogës, deklaratë që la pa gojë edhe Aida Hajnën, sot kreu i Byrosë së Hetimit, edhe Perlat Vatocin, drejtorin e Policisë Gjirokastër e plot të tjerë që ishin në atë sallë. Megjithatë ne s’kemi çfarë i bëjmë meraqeve të tilla. Si në shumë raste të tjera edhe kur na sulmoi publikisht pa asnjë shkak nuk e morëm seriozisht. Tani e tutje thjesht i urojmë shëndet e çdo të mirë tjetër.
©argjiroja.net
