Mesditën e djeshme u akuzua nga prindërit e një 17-vjeçareje se kishte marrë 1 mijë euro për të zgjidhur çështjen e rrëmbimit të vajzës së tyre, por nuk ka bërë asgjë. Eshtë fjala për prokurorin Spartak Çoçoli në Gjirokastër. Nëna e vajzës, përvec ryshfetit, e akuzon prokurorin edhe për dhunë ndaj saj në përfundim të seancës gjyqësore. Por disa orë pas akuzave, ka reaguar vetë prokurori Çoçoli, i cili është shprehur se prej 7 muajsh është munduar të kthejë vajzën në shtëpi, por ajo nuk pranon.
Sipas tij, nuk është e vërtetë që ka marrë para për këtë çështje dhe se familjarët e vajzës e akuzojnë pa të drejtë. Vajza 17-vjecare e komunitetit rom në Gjirokastër u denoncua nga prindërit si e rrëmbyer. Madje policia arrestoi disa ditë më parë rrëmbyesin Shpëtim Muharemi nga Levani. Por vetë vajza ka thënë para kamerave se ishte larguar me dëshirën e saj nga shtëpia dhe se nuk donte të kthehej më. Prindërit e vajzës pretendojnë se asaj po i bëhet presion që të shprehet në këtë mënyrë. Ndërkohë Gjykata e Gjirokastës liroi nga burgu 40-vjecarin e arrestuar për rrëmbimin dhe mbajtjen peng të vajzës.
© ArgjiroLajm.net
