AKU në Gjirokastër ju ka bërë thirrje qytetarëve të jenë të vëmendshëm për të kontrolluar datat e skadencës të produkteve që blejnë në markete. AKU ka sjellë në vëmendje gjithashtu rrezikun për produkte që ruhen në kushte ambienti.
Besim Brahimi kreu i AKU Gjirokastër, tha se janë gjobitur gjithsej 7 supermarkete në Gjirokastër dhe Përmet për shkak se ju janë gjetur produkte jashtë afatit të skadencës. Mes produkteve të rrezikshme ishin pijet freskuese, vezët, salcat e ndryshme dhe produktet e konservuara. Gjoba nga 100 mijë deri në 200 mijë lekë janë vendosur ndaj subjekteve të mëdha ndërsa janë paralajmëruar markete më të vogla për kushtet e ruajtjes së produkteve, certifikatat e origjinës dhe higjienën.
Një prej problemeve më madhore në të gjithë qarkun mbetet tregtimi në rrugë. Janë të paktën 60 shitës të vegjël ambulantë të produkteve ushqimore buzë rrugëve vetëm në Gjirokastër. AKU ju ka kërkuar qytetarëve të mos blejnë të tilla produkte sepse nuk janë të sigurta, por nga ana tjetër prej vitesh i është kërkuar bashkisë të përshtatë një mjedis sidomos për produktet e bulmetit.
Gjirokastra ka gjithsej rreth 52 subjekte me risk të lartë sa i përket sigurisë ushqimore mes të cilave 36 fabrika prodhimi produktesh ushqimore dhe 4 fabrika qumështi. Zyrtarë të AKU pohojnë se me gjithë kontrollet ende mbetet problematik tregu i palicencuar, i cili nuk mund të inspektohet. 150 subjekte janë paralajmëruar për standarde të munguara vitin e kaluar dhe numri është pothuajse i njëjtë edhe këtë vere ndërsa pjesë e kësaj statistike janë vetëm tregtarët e licencuar.
