Provë titulli në Shkodër, Elbasani sfidon Vllazninë pas polemikave

Elbasani duket se e ka lënë pas zhgënjimin e humbjes në Kupë ndaj Partizanit, edhe pse polemikat për gjykimin vazhduan për dy ditë me radhë pas përfundimit të takimit. Në kampin verdheblu është bërë e qartë se kjo çështje duhet të mbyllet për momentin dhe energjia e skuadrës të kanalizohet plotësisht te kampionati. Përballja e radhës konsiderohet ndër më të rëndësishmet e sezonit, pasi të dielën Elbasani luan në transfertë ndaj kryesuesve të Vllaznisë, në një ndeshje që mund të ndikojë drejtpërdrejt në garën për titull.

OBJEKTIVI – Takimi në Shkodër përbën një moment kyç në rrugëtimin e sezonit. Diferenca aktuale me Vllazninë është vetëm tri pikë, çka e mban plotësisht të hapur luftën për vendin e parë. Megjithatë, një humbje do ta çonte distancën në gjashtë pikë dhe do ta vështirësonte ndjeshëm misionin për kreun e renditjes. Për këtë arsye, elbasanasit janë të detyruar të synojnë maksimumin, ose të paktën të dalin me një pikë, në mënyrë që të mos lejojnë shkëputjen e rivalit direkt.

Një rezultat pozitiv do të kishte vlerë të dyfishtë: do të ruante ekuilibrat në klasifikim dhe do të forconte besimin e skuadrës për vazhdimësinë e sezonit. Përballë një kundërshtari që kryeson renditjen dhe që ka treguar stabilitet gjatë gjithë kampionatit, Elbasani duhet të tregojë maturi, përqendrim dhe efikasitet në çdo repart. Sa i përket situatës në skuadër, atmosfera paraqitet optimiste. Nuk ka lojtarë të pezulluar për shkak kartonësh, çka i jep stafit teknik mundësinë të zgjedhë formacionin më të mirë të mundshëm. Shpresohet gjithashtu që kapiteni Bruno Lulaj të jetë të paktën i gatshëm për pankinën, nëse nuk arrin të rikuperohet plotësisht nga dëmtimi. Prania e tij, qoftë edhe si alternativë, do të ishte një mbështetje e rëndësishme për grupin në një ndeshje me peshë kaq të madhe.

TRANSFERTAT – Një tjetër element që e bën sfidën më delikate është ecuria jashtë fushe. Që prej 3 nëntorit, kur fituan minimalisht 0-1 ndaj Flamurtarit, verdheblutë nuk kanë arritur më të marrin tri pikë në transfertë. Që nga ajo fitore, janë zhvilluar edhe pesë ndeshje të tjera larg “Elbasan Arena”-s dhe Elbasani nuk ka shkuar më shumë sesa barazime. Në këtë periudhë, bilanci është katër barazime dhe një humbje: Këto rezultate tregojnë se skuadra ka qenë konkurruese në çdo transfertë, por i ka munguar konkretizimi për ta mbyllur ndeshjen me fitore. Pikërisht kjo ecuri jo plotësisht produktive duhet të përballet tani me një kundërshtar që në fushën e vet ka bërë diferencën gjatë sezonit. Gjithsesi, në Elbasan ka besim se skuadra mund të reagojë në momentin e duhur. Një rezultat pozitiv në Shkodër jo vetëm që do të mbante të hapur garën për titull, por do të shërbente edhe si provë force për ambiciet reale të verdhebluve. Përballja e së dielës pritet të tregojë nëse Elbasani është gati të bëjë hapin vendimtar në luftën për kreun.