Dy janë teoritë që shpjegojnë ofertën e kryeministrit Rama ndaj Alqi Bllakos për një vend në parlament. E para është për t’i dhënë një mburojë nga hetimet e SPAK për inceneratorët, ndërsa e dyta për ta shitur në kohën e duhur, duke dhënë idenë se drejtësia e re po funksionon.
Por kur u pyet nga gazetarët para selisë së PS-së se pse e futi Bllakon në listën e sigurtë të kandidatëve, edhe pse i dinte akuzat që i bëheshin atij për aferën e incenerarotëve, Rama solli si argument padijeninë e tij për shkeljet që kishte kryer deputeti.
“Nuk ka përgjegjësi kolektive dhe zgjedhjet e njerëzve në jetë, zgjedhjet e njerëzve me të cilët vendos të lidhësh jetë, të bësh një rrugë të caktuar në punë, etj etj bazohen mbi një sërë arsyesh dhe kriteresh të cilat nuk prezumojnë për askënd se kush zgjedh është përgjegjës, nëse i zgjedhuri prej tij ose saj në një moment të caktuar shkel ligjin. Për këtë arsye gjërat janë të ndara.Sot që flasim, përgjigjia ime është në parim. Në rastin konkret dhe në të gjitha rastet këtë e cakton drejtësia. Deri kur drejtësia të thotë fjalën e fundit, këta njerëz janë të pafajshëm” tha kryeministri, pas mbledhjes së kryesisë së PS.
Në deklaratën e tij, Rama tha se ndjehej i keqardhur si individ për arrestimin e deputetit, por nuk mbante asnjë përgjegjësi, sepse përgjegjësia ishte individuale.
