Traileri i shumëpritur i sezonit të tretë të serialit hit “Euphoria” u publikua ditën e djeshme, duke ndezur menjëherë rrjetet sociale dhe fansat në mbarë botën. HBO konfirmon se sezoni i ri do të ketë premierën më 12 prill në HBO dhe HBO Max, duke shënuar rikthimin e një prej dramave më të diskutuara të dekadës.
Në sezonin e tretë rikthehen emrat kryesorë të kastit: Zendaya, Sydney Sweeney, Hunter Schafer, Jacob Elordi, Eric Dane, Alexa Demie, Maude Apatow, Martha Kelly, Chloe Cherry, Colman Domingo dhe Dominic Fike. Ndërkohë, disa personazhe të njohur mungojnë këtë herë, përfshirë Barbie Ferreira, Storm Reid, Javon Wanna Walton dhe Austin Abrams. Sezoni shënon gjithashtu mungesën e dhimbshme të Angus Cloud, i cili ndërroi jetë në korrik 2023 në moshën 25-vjeçare, pas një performance të paharrueshme si Fez.
Ngjarjet e reja zhvillohen pesë vjet pas finales së sezonit të dytë. Cassie dhe Nate janë të martuar dhe jetojnë një jetë të qetë në periferi, ndërsa Rue ndodhet në Meksikë, duke u përballur me pasojat e së kaluarës dhe një borxh të rrezikshëm ndaj Laurie. Jules ndjek shkollën e artit, ndërsa Maddy nis një kapitull të ri duke punuar në një agjenci talentesh në Hollywood.
Sezoni i tretë sjell edhe një listë mbresëlënëse emrash të rinj, përfshirë Sharon Stone, Rosalia, Trisha Paytas, Natasha Lyonne dhe shumë të tjerë, duke premtuar surpriza, drama intensive dhe një “Euphoria” më të errët se kurrë më parë.
