Putin nuk tërhiqet pas ultimatumit të Trump/ Mediat: 160 mijë trupa në front, Rusia mund të nisë një …

Rusia ka shënuar epërsi në terren në javët e fundit, edhe pse përparime të vogla, por vendimtare në Ukrainën lindore. Vendimi i Donald Trump për të vendosur sanksione të reja për Kremlinin duke i lënë Rusisë një afat 50-ditor, shihet si një dritare e vlefshme veprimi për Vladimir Putin i cili parashikohet të shtojë presionin ushtarak ndaj fqinjit jugor.
Sipas zyrtarëve ukrainas, rreth 160,000 ushtarë rusë janë grumbulluar pranë vijës së frontit, në pritje të një ofensive verore në shkallë më të gjerë.
Megjithatë, trupat ruse kanë përparuar tashmë në pikat strategjike përreth qyteteve të Pokrovsk, Kostyantynivka dhe Kupyansk , me qëllim ndërprerjen e kontaktit me forcat ukrainase.
Ministri i Jashtëm rus Sergei Lavrov u duk indiferent ndaj afatit të caktuar nga Trump. “Pesëdhjetë ditë? Më parë ishin 24 orë, pastaj 100 ditë… I kemi parë të gjitha këto”, komentoi ai.
Analistë, si Keir Giles i Chatham House, besojnë se afati i ri kohor favorizon Moskën dhe i jep asaj hapësirë për të zhvilluar nisma diplomatike paralele. “Trump mund ta pranojë menjëherë një narrativë të re ruse ”, shkroi ai.
Në Pokrovsk, ku ndodhet selia kryesore ushtarake ukrainase, forcat ruse po përpiqen të bëjnë një manovër të dyfishtë: duke iu afruar fshatit Rodynske nga verilindja dhe Udachne nga perëndimi.
Një komandant ukrainas i Brigadës së 38-të të Marinës, me nofkën “Muzikanti “, paralajmëroi se nëse rusët pushtojnë Rodynsken, ata do të kontrollojnë rrugët kritike të furnizimit.
“Nëse nuk sjellin përforcime, do të shohim një përsëritje të rrethimit dhe tërheqjes që përjetuam në Avdiivka”, tha ai.
Blogerë ukrainas si Bogdan Miroshnikov vënë në dukje se rrethimi i plotë i Pokrovskut po afron. Ukrainasit po përballen gjithashtu me një presion të ngjashëm në Kostyantynivka, ku forcat ruse po afrohen nga juglindja dhe jugperëndimi, me sulme të vazhdueshme me dronë.
Sipas postimeve nga shërbimi DeepState, pasaktësitë e brendshme në raportet nga fronti drejtuar udhëheqjes po dëmtojnë aftësinë për t’u përgjigjur. “Gënjeshtrat do të na shkatërrojnë të gjithëve”, paralajmëruan ata, duke treguar dobësinë në jug të Pokrovskut.
Në veri, Rusia përparon drejt Kupjanskut, duke siguruar akses në rrugën përmes vendbanimit Radkivka. Kontrolli i Kupjanskut është thelbësor për mbrojtjen e Kharkivit, qytetit të dytë më të madh në Ukrainë.
Presidenti rus Vladimir Putin, raportohet se duket i bindur; armët mbrojtëse të Ukrainës po shterohen.
John Lough i organizatës kërkimore New Eurasian Strategies tha se agresioni i Rusisë në tokë dhe në ajër synon demoralizimin e ukrainasve. “Do ta shohim këtë strategji të vazhdojë për të paktën 50 ditë të tjera”, tha ai./ CNN