Policia greke ka publikuar identitetet e katër personave të akuzuar dhe të shpallur në kërkim për vrasjen e pesëvjeçarit në Markopulos dhe tentativën për vrasjen e prindërve të tij. Të shpallurit në kërkim i përkasin komunitetit rom në Shqipëri. Ata janë identifikuar si Agron Tahiri, 48 vjec nga Fshati Rom, Njësia administrative Qendër në Fier, dy djemtë e tij, të cilët kanë identitet grek me gjeneralitetet Evagjelo Zafiropoulo 28 vjec dhe Dhimitrio Zafiropoulo 25 vjec dhe kushëriri i tyre Nektario Petropoulo 34 vjeç. Ndaj tyre është ngritur akuza për veprat penale: vrasje me dashje, tentativë vrasje në bashkëpunim, armëmbajtje pa leje dhe përdorim të armëve.
Ngjarja ka ndodhur më 1 nëntor në zonën e Makropoulos, ku u qëllua 15 herë me dy armë zjarri drejt një makine tip “Peugeot” ku udhëtonin një çift bashkëshortësh bashkë me vajzën dhe djalin e tyre 5-vjeçar. Sipas raportimeve nga makina e autorëve, e cila u afrua paralel me automjetin e familjes greke, kanë zbritur dy persona të cilët kanë hapur zjarr. Si pasojë e të shtënave ka mbetur i plagosur dhe më pas ka ndërruar jetë fëmija 5-vjecar i cili kishte marrë një plumb në kokë.
Mësohet se familja e 5-vjeçarit ka pasur mosmarrëveshje lidhur me drogën me autorët e dyshuar. Sipas informacioneve, mes tyre kishin ndodhur edhe tre incidente të tjera të ngjashme. Babai i 5-vjeçarit, sipas informacioneve, ndodhej në burg për një çështje droge dhe u la i lirë pak kohë më parë. Dy familjet raportohet se kanë qenë të shoqëruara në polici në të kaluarën.
