MekLaren u largua nga Çmimi i Madh i Kanadasë në Formula 1 si makina e katërt më e mirë në garë. Ekipi portokalli shënoi vetëm 12 pikë, falë Oskar Piastrit, i cili kaloi vijën e finishit në vendin e katërt. Gara në Montreal siç dihet u mbyll më një përplasje në xhirot e fundit mes dy makinave MekLaren, teksa Lando Norris goditi nga pas Oskar Piatrin, me britanikun që përfundoi më pas jashtë, duke u tërhequr.
Ky incident bëri që Norris të humbiste terren në kampionatin e pilotëve, ndërsa e pengoi gjithashtu ekipin e tij ta thellonte epërsinë në klasifikimin e kontruktorëve. Përplasja midis dy pilotëve të MekLarenit hapi një temë të madhe diskutimi rreth brenda ekipit. Megjithatë, drejtuesi e i skuadrës, italiani Andrea Stela, mohoi se do të lëshohej ndonjë urdhër ekipi, duke deklaruar se të dy pilotët do të kenë mundësi të barabarta për të garuar për titullin, duke u bazuar në meritat dhe performancën e tyre.
Por së fundmi, ish-piloti i F1, Ralf Shumacher, i cili punon si komentator për “Sky Germany”, ka deklaruar se MekLaren ka vendosur të favorizojë Oskar Piastrin për Kampionatin Botëror të këtij viti. Shumaker shpjegoi se Norris ka shumë dobësi dhe bën shumë gabime.
“Mendoj se tani është vendosur brenda MekLarenit që Piastri është njeriu tek i cili do të përqendrohet ekipi për Kampionatin Botëror”, u shpreh Rafl Shumaker, teksa më tej shtoi:
“Lando tregon shumë dobësi dhe bën shumë gabime, përfshirë përplasjen e tij të pamatur në Kanada, ku goditi nga pas Piastrin”. Përsa i përket situatës në klasifikimin e pilotëve, Oskar Piastri kryeson me 198 pikë. Piloti australian ka shënuar këtë sezon 5 fitore dhe 8 podiume. Lando Norris klasifikohet në vendin e dytë me 176 pikë, teksa numëron 2 fitore dhe 8 podiume.
Më pas në vendin e tretë ndodhet Maks Vershtapen, me pilotin e Red Bullit që numëron 155 pikë, me 2 fitore sezonale dhe 5 vende në podium. Gara e radhës në Formula 1 do të jetë këtë fundjavë në cirkuitin Red Bull Ring, aty ku do mbahet Çmimi i Madh i Austrisë.
