Kryeministri Edi Rama ka shkëmbyer batuta me sekretarin amerikan të Shtetit, Antony Blinken gjatë konferencës së përbashkët në godinën qeveritare, teksa u shpreh se “ndjej keqardhje që zgjodhët darkën në Mynih”.
“Zgjodhët ushqimin dhe jo aq të shijshëm gjerman”, u shpreh kreu i qeverisë, duke theksuar se “por ne tonën e bëmë, darkën e kishim gati”.
Rama theksoi se integrimi i vendit në BE, varet nga Shqipëria dhe aleatët e saj europianë.
Rama: Nuk mund të mos e ndaj me publikun keqardhjen që mes një darke me ne në Shqipëri dhe një darke në Mynih ku duhet të niseni menjëherë zgjodhët ushqimin dhe jo aq të shijshëm gjerman. Por ne tonën e bëmë, darkën e kishim gati.
Jemi shumë të nderuar nga vizita e tij. Mund ta them pa asnjë zbukurim diplomatik se jam shumë i kënaqur nga bashkëbisedimi i hapur dhe nga niveli ndërveprimit mes nesh.
I shpreha sekretarit të Shtetit përveç ndihmës që patëm nga SHBA në OKB dhe suksesin e misionit tonë në 2 vitet që qëndruam si anëtarë jo të përhershëm.
Nga ana tjetër dua që publikisht ta falenderoj edhe për mbështetjen që shihet pak, por që është e vazhdueshme, e rëndësishme dhe dobishme për ecurinë e vendit në procesin e anëtarësimit në BE.
Varet nga çfarë bëjmë ne, nga aleatët tanë në BE, por prej disa vitesh kemi ndjerë interesim e vazhdueshëm të administratës amerikane dhe DASH, faktit që në vazhdimësi sekretari në takimet me aleatët evropianë nuk lë pa nënvizuar nevojën për të shtyrë më tutje këtë proces të integrimit të Shqipërisë dhe Ballkanit Perëndimor.
