Kryeministri Edi Rama paralajmëroi sot se Shqipëria rrezikon të humbasë një shans historik për investime të mëdha në sektorin e ndërtimit, nëse nuk reformohen mënyrat e financimit dhe kontrollit të projekteve.
Rama theksoi se nuk mund të mbështetemi më tek “shitja në gropë”, kleringu apo blerësit rastësorë që sjell situata e brendshme e tregut.
Një nga nismat më të rëndësishme që Rama prezantoi është vendosja e monitorimit 24-orësh me kamera në kantieret e ndërtimit.
“Përmes një programi monitorimi me inteligjencë artificiale mund të ndiqet kantieri nga lart dhe mund të shikohet edhe korrektësia e punës në raport me projektin. Po përfundojmë edhe qendrën e monitorimit me drone të integruar me satelitët. Kjo do të na japë mundësi të ndjekim në kohë reale zhvillimet në territor”, tha Rama.
Rama: Mund të humbasim një shans historik dhe nuk na afrohet më njeri për të financuar. Nuk mundet që këto projekte të mëdha të realizohen ashtu siç duhet duke u mbështetur tek shitja në gropë, tek kleringu apo tek ata blerësit që sjell rasti brenda për brenda vendit. Kështu që të gjithë ato hapa që u prezantuan këtu janë hapa që do të duhet që ne ti parashohim edhe ligjërisht, duke përfshirë garancitë për lejet, duke përfshirë listën e zezë të ndërtuesve që nuk respektojnë rregullat dhe pamundësinë për të marrë me leje dhe shumë gjera të tjera që bota i ka dhe ka ardhur koha ti vëmë edhe ne. Do shohim edhe çdo që e lehtëson punën.
Ne do ta vendosim si kusht që kantieret e ndërtimit do të kenë kamera do të monitorohen 24 orë në 24. Kjo gjë padiskutim do t’ju vlejë edhe juve në ndjekjen e punëve dhe praktikën tuaj, por është shumë e vlefshme për të gjitha aspektet që lidhen me garantinë e projektit.
Përmes një programi monitorimi me inteligjencë artificiale mund të ndiqet kantieri nga lart dhe mund të shikohet edhe korrektësia e punës në raport me projektin.
Po përfundojmë edhe qendrën e monitorimit me drone të integruar me satelitët. Kjo do të na japë mundësi të ndjekim në kohë reale zhvillimet në territor.
