Kryeministri Edi Rama nuk surprizoi vetëm demokratët me propozimin e Ridvan Bodes, ish-ministrit të Financave në postin e anëtarit të Këshillit Mbikëqyrës të Bankës së Shqipërisë. Me siguri të surprizuar janë edhe socialistët, kur mes tre emrave të Ramës panë në listë edhe Suela Popën, bashkëshortja e deputetit të LSI-së në Gjirokastër, Vangjel Tavo.
Popa ka qënë për disa vite drejtoresha e Agjencisë së Zhvillimit Bujqësor e Rural, post të cilin e humbi pas marrëveshjes Rama-Basha në 17 maj 2017. Më herët ajo ka punuar edhe në Bankën e Shqipërisë. Bashkë me Ridvan Boden dhe Suela Popën, Rama ka propozuar edhe Edlira Luçin. Këto tre emra u përzgjodhën nga kryeministri mes 38 aplikantëve. Anëtarët e këshillit Mbikqyrës të Bankës së Shqipërisë zgjidhen nga Kuvendi dhe ushtrojnë këtë funksion për një mandat 7-vjeçar, me të drejtë rizgjedhjeje.
A do të ketë rezonancë në sjelljet dhe qëndrimet politike të Vangjel Tavos në raport me Ramën, fakti se bashkëshortja e tij pritet të votohet nga socialistët si anëtare e Këshillit Mbikëqyrës në Bankën e Shqipërisë? Kjo mbetet për t’u parë, sidomos në zgjedhjet lokale të qershorit. Megjithatë nuk përjashtohet mundësia që Suela Popa të jetë përzgjedhur nga Rama thjesht si profesioniste, pa marrë fare në konsideratë faktin që ajo është bashkëshortja e deputetit të LSI-së në Gjirokastër.
©ArgjiroLajm.net
