Kryeministri Edi Rama i pyetur nga Blendi Fevziu se a ka diskriminim mes biznesit të madh dhe të vogël sa i takon masave ekonomike, u shpreh se ndihma bëhet nga poshtë lart dhe jo në të kundërtën.
“Ata që dalin dhe bëjnë propozime universale tregojnë se nuk kuptojnë asgjë nga kjo që po ndodh. Lufta është shah, nuk është as bixhoz ku ti të luash blofin, sepse mund të biesh në një hon të zi, nuk është as poezi…
Luan ti, luan dhe kundërshtari që është armiku i padukshëm. Duhet të shohim vijueshmërinë e luftës dhe hap pas hapi të ndihmojmë duke filluar nga poshtë lart. Kompanitë e mëdha kanë marrë garanci sovrane dhe të hënën fillon lëvrimi”.
Rama ka sfiduar gazetarin Blendi Fevziun, i cili solli raste kur kompani të mëdha kanë larguar punonjës nga puna sepse nuk duan të marrin kredi, duke i thënë se pas 15 ditësh të bëjnë bilanc sa prej tyre kanë marrë kredi.
“Unë ju sfidoj ju, jam i gatshëm që pas 10 -15 ditësh që kamera juaj të vij pra këtu dhe të shikojmë a do kenë marrë apo jo kompanitë kreditë për të mbajtur punëtorët në punë.
Kjo nuk do thotë që kompanitë do t’i mbajnë të gjithë, por një pjesë e punëtorëve do mbahen nga kompanitë dhe për pjesën tjetër do kujdesemi ne, por këto janë me faza”.
