Në një intervistë për “Bloomberg”, kryeministri i Shqipërisë, Edi Rama, e quan “të mirë për të gjithë” Presidentin amerikan Donald Trump dhe e sheh stilin e tij të ashpër si një mundësi që Bashkimi Europian të zgjohet dhe të rifitojë fuqinë e tij globale.
Rama, i cili kërkon të fitojë një mandat të katërt në zgjedhjet parlamentare të 11 majit, është një lider i majtë që e ka ndërtuar trashëgiminë e tij politike mbi integrimin e Shqipërisë në BE deri në vitin 2030, shkruan “Bloomberg”. Por komentet e tij për Trump-in, një figurë e diskutueshme në skenën ndërkombëtare, theksojnë rolin e pazakontë që ish-presidenti amerikan po luan në fushatën elektorale shqiptare.
“Kur Trump thotë se Zoti e shpëtoi për ta bërë Amerikën përsëri të madhe, ai tregon vetëm gjysmën e historisë”, deklaroi Rama. “Gjysma tjetër është se Ai e shpëtoi Trump-in edhe për të zgjuar Europën dhe për ta bërë atë të marrë veten”.
Drejtuesi i fushatës së PD, Chris LaCivita, e ka sulmuar Ramën për lidhjet e tij me Soros, shkruan “Bloomberg”. Në shkurt, ai postoi një foto të Ramës me Sorosin në platformën X, duke shkruar: “Kukulla dhe mjeshtri i kukullave”.
Megjithatë, sipas “Bloomberg”, Rama ka ndërtuar lidhje të veta me rrethin e Trump-it. Jared Kushner, dhëndri i ish-presidentit amerikan, ka marrë miratimin paraprak për një projekt turistik luksoz me vlerë 1.4 miliardë dollarë në ishullin e Sazanit, një ish-bazë ushtarake në jug të vendit. Projekti është një nga më të mëdhenjtë në Ballkan, krahas planit për një hotel “Trump” në Beograd.
Rama mohoi që ky projekt të ketë për qëllim të fitojë pikë politike me administratën amerikane. “Në atë kohë nuk ishte diçka që do të na sillte pikë në Uashington”, tha ai, duke theksuar se Kushner e kishte vizituar ishullin që në vitin 2021, bashkë me Ivanka Trump dhe Ric Grenell. “Jam i privilegjuar të flas me Kushner dhe do të isha shumë i lumtur ta quaja mik”, tha Rama. “Nuk e di nëse ai më quan mik, por unë e quaj mik”.
Gjithashtu ai shton se projekti me Kushner nuk është një dhuratë, por një partneritet i vërtetë që kërkon dakordësi nga të dyja palët. “Nuk është se ia dhamë ishullin dhe kaq, është një partneritet”, theksoi ai.
