Kryeministri Edi Rama u kërkuar emigrantëve që të kthehen në Shqipëri dhe të investojnë këtu. Gjatë një takimi me sipërmarrës të rinj të kthyer në Shqipëri, kreu i qeverisë tha se në SHBA vërtet mund të punosh dhe të kursesh, por në vendet e BE kjo është e pamundur, për shkak se ‘nuk krijohet më kjo mundësi për shkak të kostove në raport me ça fitohet’.
“Ka akoma shumë hapësirë të pa sistemuar me rregulla. Pra në momentin që ne hyjmë në BE këto hapësira do jenë më të sistemuara. Kjo ka të mirën e vet, por ka edhe pjesën tjetër që këto fitimet e shpejta bëhen më të vështira.
Në Amerikë mund të fitosh dhe të kursesh, por në Evropë…të jesh një emigrantë shkon atje, s’ke pasaportë, s’ke leje qëndrimi, kërkon azil, në pritje të azilit të fillosh punë dhe të pretendosh që të kursesh është e pamundur. Sepse situata në vendet e zhvilluara është e tillë që nuk e krijon më këtë mundësi për shkak të kostove në raport me ça fitohet”, u shpreh kryeministri.
Rama këmbënguli që duhet të investohet në fshat, në agroturizëm, pasi sic u shpreh ai “fshati është minierë e pashfrytëzuar”.
“Një shqiptar nga Malësia e Madhe më bëri shoferin në Londër, ai kishte nja 130 veta në punë dhe më tha, sot që unë kam kompani, por sot që të mbijetosh këtu si i huaj pa dy punë në ditë harroje. Me dy punë në ditë që do shkosh në 6 të mëngjesit dhe do kthehesh në 11 të natës, do kesh mjaftueshëm për të mbyllur muajin, muajin tjetër do e nisësh nga e para. Ndërkohë që këtu është hap dhe mundësi në rast se i drejtohesh sektorit privat.
Më tepër akoma, unë mendoj se miniera e pashfrytëzuar është fshati. Kush ka në fshat një tokë, një rrënojë, fshati më i largët i mundshëm dhe rri atje në vend që të vijë të hapë një derë dhe të presë e përcjellë njerëz, bën shumë gabim. Me këtë turizëm që kemi ne, sado larg të jesh do vijnë atje. Nëse ti mendon si të bësh bujqësi është e pamundur, ndërsa po të mendosh si të bësh turizëm është gjëja me e mundur dhe më e bukur”, deklaroi Rama.
