Vinicius-Real Madrid, nga një martesë e lumtur, sot ka mbërritur në një pikë pa kthim, në një divorc i pashmangshëm, i firmosur së fundmi dhe nga vetë tifozët. Në “Bernabeu”, në atë qe ka qenë shtëpia e tij prej vitesh, në sfidën kundër Sevilla-s, Vinicius u vërshëllye dhe u kontestua në korr nga tifozët.
Në minutën e 83-ët, kur u zëvendësua, u përball me një situatë të paprecedentë për të, me tifozët që nisën ta vërshëllenin, ndërsa Vinicius reagoi në mënyrë demonstrative duke hequr fanellën, si për të konfirmuar vendimin e tij se ky ishte fundi. Jo vetëm kaq, por menjëherë sapo shkoi në dhomat e zhveshjes ndryshoi foton e profilit, hoqi foton me fanellën e Real Madrid dhe e zëvendësoi me një foto ku ishte me fanellën e Brazilit.
Situata e vështirë që Vinicius po kalon është reflektuar në mënyrë të qartë edhe në shifra, kjo ishte ndeshje e 17-të që braziliani nuk arrin të shënojë. Kjo situatë e bën thuajse të pashmangshëm largimin e tij në fund të sezonit, është e qartë që Vinicius nuk është më i dëshiruar në Madrid, nuk e do trajneri Alonso, por së fundmi nuk e duan as tifozët.
Në këto kushte, presidenti Perez nuk pritet të bëhet pengesë për largimin e tij, thjesht shpreson që të përfitojë sa më shumë nga shitja e tij. Mbetet për t’u parë se çfarë do të zgjedhë Vinicius, paratë e sheikëve, ofertat nga Arabia Saudite apo aspektin sportiv, ndonjë ekip “big” nga Premier League.
