Tv Gjirokastra kishte përgatitur sot një kronikë lidhur me përmbushjen e kërkesave të studentëve në kuadër të Paktit për Universitetin, një vit pas protestës, e cila solli më pas ndryshimet në kabinetin qeveritar. Por në vend që të pyeteshin vetë studentët, të cilët preken direkt nga përmbushja ose jo e kërkesave dhe që fundja i kishin parashtruar vetë, në kronikën plot 6 minuta flet vetëm rektori Bektash Mema.
Sigurisht që e vizaton situatën sikur të gjithë janë të lumtur dhe se kërkesat janë plotësuar në masën 90%. Kur vjen fjala tek Karta e Studentit, rektori Mema thotë se tashmë është një “proces i realizuar”.
Ai përmend këtu thjesht promovimin që i është bërë aplikimit për karta më 25 tetor të vitit 2019, ku pozoi para kamerave me kryetarin e bashkisë dhe drejtorin e postës. Por nuk di të thotë se kur ato do të jenë funksionale për studentët edhe pse kanë kaluar fiks 3 muaj që nga ajo ditë. Më tej rektori quan si arritje faktin se kanë bërë një sekretari mësimore të përqëndruar e transparente, si dhe nën vëzhgimin e kamerave.
Medemek kjo sipas tij ndihmon për të shmangur korrupsionin. Më shumë sesa përpjekje për të parë nëse janë realizuar apo jo kërkesat e studentëve, intervista ngjante më tepër me një kronikë promovuese për rektorin Bektash Mema, i cili pritet të rikandidojë sërish për një mandat të dytë. Ndiqni në videon më poshtë intervistën e tij të plotë.
©argjiroja.net
