Revolucion i vërtetë, Tiranës i largohen 12 lojtarë nga skuadra

Eksodi te Tirana është me përmasa shqetësuese. Nga 1 janari e deri në 30 qershor 2025, Tiranës i janë larguar 12 futbollistë, duke bërë që skuadra t’i futet sërish një revolucioni të vërtetë, një vit pasi Bledi shkëmbi dhe Agim Ibrahimi ndërtuan ekipin nga themelet.

“Panorama Sport” ka vëzhguar të gjitha ikjet dhe rezulton se deri tani kanë dhënë lamtumirën pa kthim 12 futbollistë, por lista ka edhe emra të tjerë.

JANAR – Në dimër u largua Aran Isuf, i cili nuk kishte më shumë se 6 muaj kontratë. Më pas me radhë, Tola, Jonuzi, Vokrri, si dhe Jaku. Ky i fundit u shit te Bolonja për një shumë 250 mijë euro. Pa llogaritur dy lojtarët që janë dhënë borxh, Cereni dhe Abdullahu.

QERSHORI – Eksodi i vërtetë nisi në fillim të qershorit. Deri tani, janë larguar Selmani dhe Harizaj në portë. Fati i Leon Kozit është i paqartë dhe nuk dihet nëse do të jetë edhe sezonin tjetër në ekip. Në mbrojtje, Përgjoni ka dhënë lamtumirën dhe është larguar, Gledi Mici është pa kontratë dhe konsiderohet i ikur. Mesfusha, veç emrave të mësipërm, nuk dihet nëse do të ketë edhe Erisildo Smaçin, i cili nuk ka kontratë, por është në dorë të klubit për të zgjatur rinovimin. Në sulm, tre lojtarë me një të rënë të lapsit kanë ikur. Ata janë Ndreca, Bajroviç dhe Prengaj.

GOLA – Me një llogari të thjeshtë, Tiranës i janë larguar 12 vetë. Një skuadër e plotë, ndërsa katër lojtarë të tjerë janë në dyshim për të qëndruar apo jo. Ekipi këtë sezon shënoi 44 gola, ndërsa 16 prej tyre janë shënuar nga lojtarët e larguar. Thënë shkurt, bardheblutë nuk do të kenë më shumë se 36 për qind të golave për sezonin e ri futbollistik.

PARATË – Tiranës i janë larguar 12 vetë, ndërsa në shifra dëmi është i madh. Veçse Jakut që u shit rreth 250 mijë euro, pjesa tjetër e lojtarëve është larguar falas. Me një llogari, skuadra ka humbur më shumë se 1.575 milionë euro nga ikja e sportistëve, pasi kartonët e 12 futbollistëve vlejnë 1.825 milionë euro. Jaku është shitur 250 mijë euro dhe minusi mbetet 1.575 milionë euro. Në çdo rast, Tirana del e humbur.