Një zjarr i egër doli jashtë kontrollit në periferi të Athinës, duke dëmtuar shtëpi dhe makina, tha Departamenti i Zjarrfikësve.
I nxitur nga erërat e forta, flakët u përhapën shpejt në shpatet e malit Hymettus, duke krijuar re të dendura tymi mbi periferitë jugore.
Si masë paraprake, autoritetet e mbrojtjes civile evakuuan disa pjesë të rajoneve të Voula dhe Glyfada rreth 20 kilometra (12 milje) nga qendra e Athinës.
Një dëshmitar i tha Reuters se pa të paktën dy shtëpi të dëmtuara rëndë nga zjarri.
“Për shkak të erërave të forta veriore, zjarri u përhap shpejt dhe iu afrua qytetit,” tha në një konferencë zëdhënësi i Departamentit të Zjarrfikësve, Yiannis Artopios.
“Kërkojmë nga bashkëqytetarët tanë të kenë shumë kujdes”, shtoi ai.
Më shumë se 130 zjarrfikës të ndihmuar nga 6 avionë zjarrfikës dhe 4 helikopterë hodhën tonelata ujë në përpjekje për të shuar zjarrin, i cili shpërtheu për më shumë se shtatë orë.
Një varg zjarresh dogji rreth 300,000 hektarë pyje dhe shkurre në pjesë të ndryshme të Greqisë verën e kaluar, mes valës më të keqe të të nxehtit në vend në 30 vjet.
