Partia Demokratike e drejtuar nga Enkelejd Alibeaj ka hapur këtë të martë zyrtarisht fushatën drejt zgjedhjeve lokale të 14 Majit. Kandidati për Tiranën, Roland Bejko, gjatë fjalës së tij ka thënë se ai është e vetmja alternativë e së djathtës shqiptare.
“Kandidatura jonë në Tiranë është e vetmja alternativë e së djathtës shqiptare në këto zgjedhje. Të gjitha të tjerët janë flamuj të majtë. Nga komunistët e deri të socialistët. Në këtë kuptim kjo garë, ka rëndësi edhe më të madhe për demokratët dhe të djathtën shqiptare.
Nuk mund ta linim ne Tiranën në dorën e së majtës, sepse e dimë shumë mirë se çfarë shkatërrimi janë për të ardhmen e saj dhe të qytetarëve të Tiranës”, u shpreh Bejko. Në një organizim të thjeshtë që mbahet në pallatin e sportit “Fahrie Hoti” në Tiranë, ai sulmoi dhe Ilir Metën, të cilin e quajti një “grabitqar politik”.
“Ne jemi këtu sot, unë jam në këtë garë pikërisht për të shpëtuar nderin dhe historinë e Partisë Demokratike që mos të rrëshqasë në duart e një autokrati lindor dhe në dorën e një grabitqari politik si socialisti Ilir Meta, të cilin Sali Berisha e ka futur në mënyrë të pabesë në gjirin e demokratëve, që ai votat e tyre ti marrë dhe t’i çojë nesër te pazari I radhës me Edi Ramën”, shtoi Roland Bejko.
