Pas një jave përgatitjeje me intensitet të lartë, stafi teknik i Luftëtarit ka menduar që ekipi të pushojë të martën, pushim i cili vjen katër ditë para transfertës së Kukësit. Me objektiv primar vijimësisë e serisë së rezultateve pozitive, gjirokastritët janë të bindur se ata nuk do të zhgënjejnë në takimin mbyllës të fazës së tretë. Donald Rrapo, mesfushori i Luftëtarit, në prononcimin e tij për “Panorama Sport”, pohoi se në Kukës i pret një ndeshje tejet e vështirë, por jo e pamundur për të synuar rezultatin pozitiv.
“Kukësi është një skuadër për t’u admiruar, pasi i ka dhënë garës për titullin kampion mes skuadrave si Partizani dhe Skënderbeu më shumë bukuri dhe agresivitet. Është e kuptueshme që na pret një ndeshje shumë e vështirë. Do të luajmë me kryesuesit e Superiores, por kjo s’do të thotë se në fushë do të hyjmë të dorëzuar, përkundrazi do të besojmë deri në fund te rezultati pozitiv.
Kemi dy javë që po përgatitemi fort për këtë ndeshje, me objektiv marrjen e maksimumit. Mungesat e rëndësishme na ‘privojnë’ në njëfarë mënyre objektivin, por Luftëtari ka në përbërje të tij lojtarë cilësorë, të aftë për t’u përballur me çdo kundërshtar. Jemi skuadër pa yje, por kemi mentalitetin e fituesit, ndaj dhe me Kukësin, si në çdo ndeshje, do të synojmë rezultatin pozitiv”, u shpreh 26-vjeçari i Luftëtarit, Donald Rrapo.
Gjirokastritët, në dy përballjet e luajtura me Kukësin këtë sezon futbollistik, kanë arkivuar një humbje dhe një barazim. 1-0 janë mundur gjirokastritët në “Zeqir Ymeri” në fazën e parë dhe kanë barazuar 2-2 në sfidën e dytë në stadiumin “Gjirokastra”. Në këtë ndeshje eurogoli i Donald Rrapos, në minutën e 87-të, nga rreth 30 metra u ngriu buzëqeshjen e fitores së parakohshme verilindorëve.
Rrapo, edhe pse nuk e kanë nisur lojën si titullar në shumë takime, atëherë kur i janë kërkuar shërbimet e tij ka ditur të japë më të mirën në fushë, pavarësisht pozicionit ku ka luajtur. Me të drejtë në Gjirokastër Rrapon e etiketojnë si “asi nën mëngë” i Milinkoviçit.
