Spitali rajonal “Omer Nishani” në Gjirokastër nuk ka vetëm probleme me mungesë të disa mjekëve specialistë, si kudo gjetkë nëpër Shqipëri, por ka probleme të shumta infrastrukturore. Në stinën e dimrit është sidomos shqetësuese mungesa e sistemit të ngrohjes.
Ndonëse janë kryer shpenzime në të shkuarën për sistemin e kaldajave ai nuk është në funksion. Herë spitali dhe në të shumtën e rasteve pacientët që shtrohen për të marrë mjekim nëpër pavionë, e zgjidhen problemin e ngrohjes me rezistenca të lëvizshme. Jo vetëm kaq, por shumë prej ambienteve të tjera të spitalit janë të rrënuara dhe kanë nevojë emergjente për rikonstruksion të plotë e pajisje logjistike të reja.
Për herë të fundit spitali “Omer Nishani” është rikonstruktuar në vitin 2009, plot 15 vite më parë. Mësohet se sot ishte në Gjirokastër për një vizitë edhe ministrja e re e Shëndetësisë, Albana Koçiu, e cila ka parë vetë nga afër gjendjen e spitalit dhe është zotuar se do të investohet për rikonstruksionin e plotë.
Mbetet për t’u parë se kur do të nisë puna dhe si do t’i jepet zgjidhje të vetmit spital rajonal në jug të vendit. Vitet e fundit shërbejnë në Gjirokastër shumë mjekë të rinj, megjithatë mungesat janë ende evidente. Në dekadën e fundit Shqipëria ka humbur shumë mjekë dhe infermierë, të cilët braktisën vendlindjen në kërkim të jete më të mirë drejt Gjermanisë. ©Argjiroja.net
