Kamza zhvillon këtë të mërkurë në Gjirokastër një nga sfidat më të rëndësishme të sezonit, rezultati i së cilës vendos shumë për objektivin mbijetesë. Përballë një rivalki direkt si Luftëtari kërkohet medoemos shmangia e humbjes. Trajneri Klodian Duro, në konferencën për shtyp para kësaj transferte, reflektoi qetësi në fjalët e tij, duke i dhënë besim skuadrës.
“Jemi përgatitur këto ditë për të shkuar në Gjirokastër duke e ditur se kemi përballë një ekip që ka pretendimet e veta, por nuk jemi nën presion. Kemi punuar për të rregulluar disa mangësi që kemi shfaqur, por jam shumë i qetë dhe plot besim, sepse kemi luajtur mirë dhe kjo është më e rëndësishmja në futboll. Nisemi për të korrigjuar atë që na ka munguar në ndeshjet e fundit, mungesën e golit, që bën diferencën në futboll.”
Duro, duke vijuar bisedën për mungesën e golit, shprehet se me dalje logjike në sulm Kamza do të arrijë të shënojë.
“Nuk është e lehtë, gjetja e golit është pjesa më e vështirë në futboll. Jo rastësisht, edhe klubet e mëdhenj paguajnë miliona për të gjetur sulmues goli. Fitorja është pjesa më e vështirë e futbollit, por jam i qetë, sepse po krijojmë shumë raste dhe po luajmë me logjikë, që më ngroh, ndaj mendoj se do t’ia dalim të konkludojmë këtë lojë të mirë me gol dhe të marrim pikë. Është një situatë e ndryshme nga ajo që një trajner do donte, duke nisur gjithçka nga fillimi, por e kam thënë edhe më parë që kam pranuar të marr drejtimin e Kamzës sepse kam parë ndeshje mjaft të mira nga kjo skuadër, që ka mundësi për të shkuar lart në renditje.”
A rrezikon Duro pozicionin e tij në rast dështimi në Gjirokastër?
E ardhmja ime do të jetë siç e shihni aktualisht. Do të punojmë akoma më shumë, për të përmirësuar shënjestrën dhe për të marrë pikë, duke parë gradualisht drejt pjesës së sipërme të renditjes. Unë nuk fshihem pas gishtit, nuk kam frikë nga asgjë dhe kur kam marrë përsipër drejtimin e Kamzës e di mirë sa është “krevati” i Kamzës dhe sa na duhet “jorgani”. Do të eci përpara me filozofinë time të futbollit, të një futbolli kreativ dhe sulmues, që në syrin tim në Superioren shqiptare të çojnë te rezultatet. Nuk do ndryshoj asnjë në aspektin e lojës, por do të ndryshojmë në urinë tonë për të konkluduar rastet tona.
