Drejtuesi politik i Partisë Socialiste në Vlorë, Bledi Çuçi ka zhvilluar një bashkëbisedim me banorë të krahinës së Smokthinës në Selenicë, me të cilët diskutuan problemet që kanë ato fshatra e sidomos çështja e rrugës. I pranishëm ishte edhe deputeti Vullnet Sinaj e kryebashkiaku Nertil Bellaj.
“Bashkë me Vullnetin dhe Nertilin zhvilluam një takim me banorë të krahinës së Smokthinës, me të cilët diskutuam për nevojën e ndërhyrjes në infrastrukturën rrugore, investim që do të çlironte potencialet e fjetura për zhvillimin e agroturizmit në fshatrat Mesaplik, Ramicë, Matogjin, Kocul, Gjorm, Vranisht e Tërbaç. Natyra është treguar shumë bujare me këtë krahinë duke i falur bukuri të jashtëzakonshme. Ne kemi përgjegjësinë të bëjmë gjithçka duhet dhe kemi në dorë për të ndihmuar banorët. Plot besim se më herët sesa vonë do të kemi lajme të mira për Smokthinën”, thotë Çuçi teksa publikon edhe pamje nga takimi.
