Sali Berisha ka reaguar në televizionin e të birit pas përjashtimit nga PD, nga ana e Lulzim Bashës.
Ai ka thënë se me këtë vendim Basha ka asgjesuar Partinë Demokratike.
Sipas Berishës, vendimi i Bashës është jashtë çdo ligi e norme.
Për Berishën, ai që duhej të largohej ishte Basha, jo Berisha.
“Vendimi është një vendim jashtë cdo lloj norme statutore dhe ligji të vendit.
Natyrisht një vendim të tillë, një njeri që respekton parimet më elementare të një force politike të lirë dhe të një shoqërie të lirë nuk mund ta marrë.
Unë e kuptoj presionin e jashtëzakonshëm që ai ka pasur, por pavarësisht nga presioni mendoj se disa herë më parë do të konsideronte dorëheqjen e tij se sa të dorëzonte sovranitetin e PD-së.
Se PD është një institucion i sovranitetit të vendit.
Me njoftimin që shpalli z.Basha dëshmoi se, bëri atë që nuk e bëri Ilirjan Celibashi, vendosi të dorëzojë sovranitetin faktikisht të asgjesojë PD-në si parti sovrane për shkak të presioneve të jashtëzakonshme të lobimit korruptiv të Ramës edhe Sorosit.
Jam i sigurt që Bashën e kanë kërcënuar me saksione”, tha Berisha
“Për të marrë një vendimi të tillë, zoti Basha duhej të mblidhte Kongresin e PD-së, të ndryshonte statutin e PD, të vendoste një nen në statut, ku të sanksionohej përjashtimi nga grupi i personave që dezinjohen non-grata nga SHBA apo një vend tjetër.
Ky nen nuk mund të konsiderojë pa transparencën. Ai, për interesa të caktuara, shpalli një vendim që është nul, pasi është vendim i tij dhe i asnjë forumi të PD. Por ky nuk është thelbi, por thelbi është dorëzimi i sovranitetit të PD.
Mendoj se Shqipëria ka humbur, e tërë shoqëria shqiptare ka humbur, sepse një forcë politike sovrane mund të qeverisë vendin, sepse vetëm një forcë politike sovrane mund të jetë një opozitë e pavarur e interesave publike dhe jo e manipuluar apo e urdhëruar nga forca të tjera,” vijoi Berisha.
