Inspektorati Kombëtar i Mbrojtjes së Territorit ka shembur 2 ndërtesa pa leje në Ksamil gjatë ditës së sotme pas denoncimit që një shtetas i huaj bëri në një media lokale në Sarandë. Dy objektet e shembura për të liruar hapësirat publike në plazhe, janë lokale private, të cilat ishin ndërtuar pa leje dhe zhvillonin aktivitetin e tyre gjatë sezonit veror.
“Sa e trishtë!!!! Unë isha këtë fundjavë duke lundruar rreth ishujve të Ksamilit dhe më pas qëndrova atje për dy orë me familjen time dhe pashë këtë situatë. Kjo ndërtesë mbiu brenda 4 orëve nga asgjëja, turp për institucionet që janë përgjegjëse për të mbrojtur këtë vend të bukur. Nuk e di nëse është e ligjshme apo jo, por shkatërrimi i natyrës është një mënyrë e gabuar për të ardhmen e vendit tuaj“, denoncoi i huaji.
