Në mesjavë ekipi i Kukësit do të ndeshet në transfertë përballë Luftëtarit, në ndeshjen e vlefshme për javën e 25 të Superiores. Një ndeshje më e veçantë do të jetë ajo në Gjirokastër për Besar Musollin. Kjo pasi ndaj Luftëtarit mesfushori i Kukësit do të realizojë ndeshjen e 200-të për fanellën e verilindorëve. Në një intervistë për “Supersport”, Musolli ka rrëfyer karrierën e tij, duke veçuar faktin se pengu i tij janë grupet e “Europa League”.
“Jam shumë i lumtur pasi kam kaluar 6 vite sakrificë dhe vuajtje. Këtu nuk duhet të harroj edhe momentet e mira që kam kaluar te Kukësi. Rastësia ka qenë që të bëjë debutimin me Luftëtarin, të fitojmë titullin ndaj kësaj skuadre, por edhe të festojë ndeshjen e 200 kundër këtij ekipi.
Për Hallaçin kam respekt shumë të madh, normalisht që kam kënaqësi që e kaloj rekordin e tij me prezencën në fushën e lojës me këtë fanellë, por për mua ai është ikona e këtij klubi.
E veçanta e këtyre 200 ndeshjeve, është se kam arritur të gjitha trofetë që e bëjnë një futbollist të ndihet i lumtur. Një peng që na kanë mbetur të gjithëve janë grupet e “Europa League”. Më kujtohet fitimi i Kupës së Shqipërisë me Klodian Duron, por pa harruar edhe titullin kampion me Ernest Gjokën.
Nuk e di sekretin e jetëgjatësisë në këtë ekip, por jam ndierë mirë me të gjithë drejtuesit e klubit. Kulmi për një futbollist është që të luajë për vendin e tij dhe për mua ishte kënaqësi të luaja me Kosovën. Mundohem të jem sa më i thjeshtë sepse jeta për futbollistin është e shkurtër dhe ajo që mbahen mend janë vetëm kujtimet. Ëndrra ime është që të kem performanca sa më të mira dhe të arrijë në Europa League”, është shprehur Besar Musolli
