Mbrojtësi i Kukësit, Ylli Shameti është shumë i lumtur për golin e shënuar dhe për fitoren që arriti skuadra e tij. Në një intervistë për “Panorama Sport”, ai thotë se gjirokastritët duhet ta mbështesin në luftën drejt titullit kampion. Shameti ia dedikon golin djalit të tij, i cili kishte kërkuar prej kohësh të shënonte.
Sa i kënaqur je për golin e parë në kampionat, për më tepër ndaj ish-skuadrës tuaj?
Jam shumë i lumtur për golin sepse ai i hapi rrugë fitores së ekipit. Unë jam profesionist dhe si i tillë duhet të jem kundër çdo ekipi, përfshirë këtu edhe skuadrën time të vendlindjes.
U duket se festuat shumë për këtë gol…
Nuk festova në shenjë respekti, por thjesht u gëzova në atë moment për faktin që u zhbllokova sepse nuk kisha shënuar ende asnjë gol në këtë kampionat.
Sa të qetë jeni tani pas kësaj fitoreje?
Nuk mund të ketë qetësi përpara përfundimit të kampionatit. Vetëm kur t’i kemi luajtur të gjitha ndeshjet mund të jemi të qetë.
Si e shikon garën për titull?
Kemi për të luajtur edhe 9 finale, në të cilat duhet të marrim maksimumin. Uroj dhe shpresoj që t’ia dalim deri në fund. Nuk është e lehtë, por do të bëjmë gjithçka për të fituar.
Kujt ia dedikoni këtë gol?
Ia dedikoj djalit tim Roanit, i cili kishte kohë që më kërkonte një gol. Ai është frymëzimi im në çdo gjë.
Ju erdhi keq që pas golit të shënuar mërzitët bashkëqytetarët tuaj gjirokastritë?
Mendoj që gjirokastritët duhet të jenë të gëzuar për faktin që unë jam duke ecur drejt titullit kampion. Besoj që duhet të më mbështesin.
