Teksa Partia Demorkatike ka dalë hapur kundër paketës AntiKÇK, duket se partnerët ndërkombëtarë e kanë mirëpritur nismën në fjalë.
Pas Delegacionit të Bashkimit Evropian, ka qenë ambasada amerikane ajo që ka reaguar përmes një deklarate.
SHBA shprehen se paketat e miratuara nga qeveria janë përpjekje e intensifikuar kundër krimit. Ambasada thekson se ato janë të mirëpritura nga Uashingtoni.
“Ndërsa vazhdon zbatimi i reformave të rëndësishme të drejtësisë, Shtetet e Bashkuara mirëpresin përpjekjet e intensifikuara nga Qeveria e Shqipërisë për të parandaluar krimin e organizuar që të përdorë pasurinë e paligjshme për të minuar themelet e shtetit ligjor.
Mekanizmat e përforcuar për zbatimin e ligjit duhet edhe të mbështesin institucionet e reja të drejtësisë të ngarkuara me ndjekjen penale të krimit të organizuar, edhe të harmonizohen me standardet e procesit të drejtë ligjor.
Ne do të vazhdojmë ta ndjekim zbatimin e këtij ligji me interes te madh” – shkruan Ambasada e SHBA-ve në Facebook.
Një ditë më parë, PD u shpreh se vendi nuk ka nevojë për ligje të reja. “Krimin mund ta luftojmë vetëm ne kur të drejtojmë qeverinë” – shprehej selia blu në deklaratë.
