Rreth një muaj më parë në Kardhiq nisën punimet për rrugën e re kombëtare, që do ta lidhë zonën me Delvinën, duke shmangur kështu Qafën e Muzinës për të shkuar në Sarandë.
ArgjiroLajm.net sjell video nga kantieri i kësaj rruge, ku siç shihet punimet vijojnë me ritëm të lartë. Në muajin prill të këtij viti, qeveria hapi zyrtarisht tenderin për ndërtimin e rrugës Kardhiq – Delvinë. Ky segment ka një gjatësi prej 34 kilometrash dhe kosto e saj llogaritet të shkojë 64 milionë euro.
Ajo është cilësuar një nga akset me prioritare që shkurton në rreth 3 orë kohën nga Tirana në Sarandë, duke i dhënë një hov të mëtejshem turizmit. Historia e ndërtimit të segmentit Kardhiq – Delvinë nis që në vitin 2008, por deri tani janë përfunduar 7.6 km nga Ura e Kardhiqit në drejtim të Fushë Bardhës dhe 9.7 km nga Delvina në drejtim të Vergoit. Ndërtimi i kësaj rruge konsiderohet si një investim shumë i rëndësishëm, jo vetëm për ekonominë lokale, por për mbarë vendin.
©ArgjiroLajm.net
