Autoritetet italiane kanë zhvilluar një operacion në provincën e Modenës dhe Romës, ku si pasojë kanë rënë në pranga nëntë persona, shtatë italianë dhe dy shqiptarë. Të arrestuarit dyshohet se janë anëtarë të një organizate kriminale të përfshirë në trafikun e drogës dhe armëmbajtje pa leje.
Sipas mediave italiane hetimet ndaj grupit kriminal nisën prej vitit 2021 dhe anëtarët e grupit kriminal trafikonin drogë në Tivoli dhe Guidonia Montecelio, ku promotorët e shoqatës kishin zhvilluar një strukturë të rëndësishme logjistike për shitjen e lëndëve narkotike.
Përveç drogës ata po ashtu shpërndanin dhe shisnin armë në këtë zonë. Mes të arrestuarve është edhe një italiane 79-vjeçe, e cila kishte fshehur në shtëpinë e saj lëndë narkotike dhe shuma parash, që dyshohen se janë përfituar nga trafiku i drogës. Gjithashtu bëhet e ditur se grupi krimianl mbledhjet i bënte në një kotec pulash, që konsiderohej një vend i sigurt për t’iu shmangur çdo përgjimi.
