4 fitore në 5 ndeshjet e fundit në Serie A, e vendosin Juven në zonën Champions, aktualisht në vendin e 4-ët në kuotën e 45 pikëve, një më pak se Napoli. Ekipi i Spallettit triumfoi me “poker” golash në transfertë përballë Parma-s, një sukses 1-4 që nuk e vendosën thuajse asnjë moment në dyshim. “Zonja e Vjetër” e nisi ndeshjen “zjarr”, ku që në start goditën traversën, ndërsa në minutën e 15-të ishte Bremer që me kokë zhbllokoi ndeshjen. Në të 37-tën, një nga lojtarët e momentit në radhët e Juves, McKennie me një veprim akrobatik brenda në zonë dyfishoi shifrat.
Në fraksionin e dytë, për të rikthyer Parma-n në lojë mendoi Cambiaso që në përpjekje për të larguar topin e devijoi në portën e tij duke ngushtuar shifrat në 1-2. Festa e Parma-s nuk zgjati shumë pasi tre minuta më vonë ishte sërish Bremer që realizoi golin e tretë për Juven dhe të dytin personal. Për të mbyllur llogaritë me Parma-n mendoi David, me sulmuesin kanadez që e kishte të lehtë të shtynte topin në rrjetë në minutën e 64-ët duke sigluar shifrat në 1-4.
Në përfundim të ndeshjes, Luciano Spalletti shijoi fitoren përballë Parmës, ndërsa saktësoi se Mauro Icardi, një nga emrat e lakuar këtë periudhë nuk do të vijë në Torino. Përpara ndeshjes kundër Parama-s, Juve befasoi jo pak duke prezantuar afrimin e tyre të ri.
Me anë të një deklarate për mediat, “Zonja e Vjetër” njoftoi se Jeremie Boga është lojtari i ri i Juves, me sulmuesin që vjen nga Nice në formë huazimi deri në fund të këtij sezoni me të drejtë blerje për 5 milionë euro. Jeremie Boga shihet si një zëvendësues i Yildiz, por futbollisti nga Bregu i Fildishtë mund të luajë edhe si qendërsulmues.
