Skandal korrupsioni me dronët ushtarakë në Ukrainë, arrestohen deputetë dhe zyrtarë të tjerë të lartë

Përshtatur në shqip, artikull i BBC-së
Një deputet ukrainas dhe zyrtarë të tjerë janë arrestuar pasi agjencitë anti-korrupsion të vendit zbuluan një skemë të madhe ryshfeti në blerjen e dronëve dhe sistemeve të luftës elektronike.
Në një deklaratë në rrjetin social X, Presidenti Volodymyr Zelensky tha se një deputet ukrainas, kryetarë administratash rajonale dhe qytetare, si dhe disa anëtarë të Gardës Kombëtare janë ekspozuar për përfshirjen e tyre, që kishte të bënte me kontrata shtetërore me furnizues që u nënshkruan me çmime të fryra deri në 30%.
Zelensky shkroi se për korrupsionin në Ukrainë do të ketë “tolerancë zero”, dhe falënderoi agjencitë për punën e tyre.
Kujtojmë se pavarësia e agjencive anti-korrupsion të Ukrainës u rikthye të enjten, pas protestave në gjithë vendin. Qeveria e Zelensky përballoi një kundërshtim të gjerë pas miratimit të një projektligji që do të hiqte pavarësinë e Byrosë Kombëtare Anti-Korrupsion (NABU) dhe Zyrës së Prokurorit Special Anti-Korrupsion (SAP).
Presidenti pretendonte se agjencitë duhej të “pastroheshin nga ndikimi rus” dhe synonte t’i jepte prokurorit të përgjithshëm autoritetin për të vendosur se kush duhej të ndiqej penalisht në rastet e korrupsionit në nivele të larta.
BBC shkruan se shumë e panë këtë veprim si një hap prapa për luftën kundër korrupsionit në Ukrainë, duke shkaktuar demonstratat më të mëdha anti-qeveritare që nga fillimi i pushtimit të plotë rus në vitin 2022.
Zelensky pranoi zemërimin publik dhe paraqiti një projektligj të ri që rikthente pavarësinë e mëparshme të agjencive, i cili u miratua nga parlamenti vetëm nëntë ditë pas miratimit të projektligjit origjinal.
Kreu i Drejtorisë Kryesore të Inteligjencës në Ministrinë e Mbrojtjes së Ukrainës (HUR), Kyrylo Budanov, e falënderoi Zelenskyn për “dëgjimin e thirrjes së publikut” në lidhje me fuqitë e agjencive anti-korrupsion dhe për “zhbërjen e gabimit”.
Ky veprim u përgëzua gjithashtu nga aleatët e BE-së, të cilët kishin shprehur shqetësime lidhur me pasojat e projektligjit origjinal.
Lufta kundër korrupsionit është me rëndësi të madhe në përpjekjet e Ukrainës për t’u bashkuar me BE-në. Krijimi i NABU-së dhe SAP-it ishte një kërkesë e Komisionit Evropian dhe Fondit Monetar Ndërkombëtar në vitin 2014, për të avancuar drejt lehtësimit të kufizimeve të vizave.
Si rezultat, Kievi mori statusin e kandidatit për BE në vitin 2022, duke e afruar vendin një hap më pranë lidhjeve më të ngushta me Perëndimin.
Që nga themelimi i tyre, NABU dhe SAP janë përfshirë në hetime të gjera mbi keqpërdorimin e miliona dollarëve pasuri dhe ryshfetesh në ministri dhe sektorë të ndryshëm.
Një hetim i përbashkët në vitin 2023 çoi në arrestimin e kreut të Gjykatës së Lartë të Ukrainës, Vsevolod Kniaziev, lidhur me një ryshfet prej 3 milionë dollarësh (2.9 milionë euro).